Edita Tahiri, udhëheqëse e delegacionit kosovar në dialogun me Serbinë

Negociatat do të "hapen" në Bruksel, ndërsa në krye të listës janë trafiku ajror, telekomunikacioni dhe ndoshta çështja e të zhdukurve

Kryeministri Hashim Thaçi e ka emëruar sot Edita Tahirin, zëvendëskryeministre e Qeverisë, udhëheqëse të delegacionit të Kosovës për dialog për çështje praktike me Serbinë.

Në një komunikatë të lëshuar nga Zyra e Kryeministrit, thuhet e dialogu si shtete të pavarura dhe sovrane me të gjitha shtetet fqinje, përfshirë Republikën e Serbisë, dhe zgjidhja e problemeve praktike në të mirë të të gjithë qytetarëve të rajonit, është vlerë dhe standard evropian.

Dje, në mbledhjen e parë të Qeverisë së Kosovës, kryeministri Thaçi ka folur për dialogun me Serbinë. Ai ka thënë se Qeveria është e gatshme për dialog, mirëpo pa prekur çështjen e statusit, integritetit territorial.

Ndërkohë, Beogradi zyrtar pret për dy tri javë ekipet negociuese të ulen pranë tavolinës dhe të çelin temat e para që i ngarkojnë serbët dhe shqiptarët e Kosovës. “Beogradi është i gatshëm, ekipi është formuar, ndërsa platforma negociuese është harmonizuar me Kushtetutën serbe dhe Rezolutën 1244. Kanë mbetur për t’u harmonizuar vetëm edhe disa detaje teknike dhe dialogu mund të fillojë”, kanë raportuar mediat serbe që mbështeten në burime nga qeveria serbe.

Negociatat, sipas të gjitha gjasave, do të “hapen” në Bruksel, ndërsa në krye të listës së temave për momentin janë trafiku ajror, telekomunikacioni, kadastra dhe ndoshta, çështja e të zhdukurve.