Integrimi

Solemniteti i pavarësisë (nuk) ndikohet nga zymtësia politike në Kosovë

Ambasadori Malaj ka përshëndetur posaçërisht bashkatdhetarët që i ka quajtur “përfaqësuesit më të mirë të kulturës dhe qenies sonë këtu”

E diel, 20 Shkurt 2011 - 8:56 albinfo.ch

Në një atmosferë solemne, Ambasada e Republikës së Kosovës në Bernë ka festuar për të tretën herë 17 Shkurtin, Ditën e pavarësisë së Kosovës.

Zymtësia e atmosferës politike të Kosovës së muajve të fundit, si pasojë e raporteve të ndryshme dhe mungesës së stabilitetit institucional, nuk kishte mbërritur deri në sallën solemne të hotelit “Bellevue Palace” të Bernës. Aty po festohej tre vjetori i pavarësisë së Kosovës, me një prani të konsiderueshme të pjesëtarëve të korit diplomatik të akredituar në Bernë dhe të përfaqësuesve të institucioneve zvicerane.

Nuk mungonin, sigurisht, as ambasadorët tjerë shqiptarë (të Shqipërisë dhe të maqedonisë, në Bernë dhe në Gjenevë). Po ashtu, të pranishëm ishin edhe miq të dëshmuar të shqiptarëve dhe të Kosovës, si Ueli Leuenberger, kryetar i Partisë së Gjelbër të Zvicrës dhe deputet federal etj. Merrnin pjesë edhe përfaqësues të subjekteve të ndryshme politike e kulturore shqiptare në Zvicër.

Siç është e zakonshme në raste të tilla, ambasadori i Republikës së Kosovës në Zvicër, Naim Malaj iu drejtua të pranishmëve me një fjalë përshëndetëse. Me këtë rast Malaj u ndal më shumë në vitin e kaluar, mjaft të bujshëm për nga zhvillimet, pozitive dhe negative, në lidhje me Kosovën. Ai, në këtë kuadër, përmendi si sukses vendimin e Gjykatës Ndërkombëtare të Drejtësisë të shqiptuar në korrikun e e kaluar e cila konfirmoi se “miratimi i Deklaratës së Pavarësise të 17 shkurtit 2008 ishte konform të drejtës ndërkombëtare”.

Por, ngjarja që ka lënë në kujtesë negative vitin e kaluar, sipas ambasadorit ka qenë gjithsesi raporti i dëmshëm për Kosovën, i Dick Marty-t. “Republika e Kosovës ka treguar besim të plotë në drejtësinë ndërkombëtare, duke ofruar bashkëpunim të plotë me Gjykatën e Hagës. Kosova nuk do t’ju shmanget përgjegjësive te veta, dhe dëshiron thellësisht që të tregohet e vërteta mbi luftën e Kosovës”, ka siguruar Malaj.

Ai me këtë rast ka falënderuar institucionet zvicerane për ndihmën e vazhdueshme që i japin Kosovës.

Një falënderim të posaçëm u ka drejtuar ambasadori i Kosovës në Zvicër atyre që i ka quajtur “përfaqësuesit më të mirë të kulturës dhe qenies sonë”. Kosovarët që punojnë e jetojnë në Zvicër, shoqatat e artistët, gazetarët, afaristët, studentët dhe të rinjtë tanë të angazhuar në politikën e Zvicrës.

Siç bëri të ditur ambasadori Malaj për albinfo.ch, frika se hija e raportit të Marty-t do të zgjatej edhe mbi këtë solemnitet, për fat të mirë, doli e pa bazë. “Numri i ambasadorëve dhe i përfaqësuesve të ambasadave që kanë ardhur në manifestimin tonë është i përafërt me atë të viteve të kaluara”, ka thënë z. Malaj. Po kjo, sipas tij mund të thuhet edhe për përfaqësuesit e institucioneve zvicerane. “Me disa përjashtime të vogla, në nivelet e tyre përfsaqësuese”, ka shtuar ai.