Zvicër: 60 manifestime për Ditën e Punës, 1 Majin

Sindikatat Zvicerane (SGB) për 1 majin e sivjetshëm kanë caktuar si moto “Të luftojmë së bashku – për një AHV të Fortë” (AHV: pensioni i moshës dhe trashëgimisë)

(KEYSTONE/Georgios Kefalas)

Dita e Punëtorëve, 1 Maji sot shënohet me manifestime të shumta në gjithë Zvicrën. Në 20 kantone janë paralajmëruar rreth 60 manifestime, në të cilat do të marrin pjesë edhe krerë të shtetit dhe të sindikatave.

Sindikatat Zvicerane (SGB) për 1 majin e sivjetshëm kanë caktuar si moto “Të luftojmë së bashku – për një AHV të Fortë” (AHV: pensioni i moshës dhe trashëgimisë), njofton rsf.ch.

Sipas sindikatave duhet luftuar për punën dhe për kushte të mira të punës. Kjo sidomos në një kohë kur punëdhënësit marrin si shkas forcimin e frangut për të bërë shkurtime masive të vendeve të punës ndërsa partitë e djathta duan ta shkatërrojnë AHV-në.

Ministri federal nga Partia Socialdemokrate, Alain Berset do të mbajë një fjalim në tubimin që do të mbahet në Aarau. Ndërsa së bashku me ministren tjetër nga po kjo parti, Simonetta Sommaruga, do të vizitojnë Spitalin Kantonal në Winterthur.

Kryetari i SGB-së dhe deputeti i SP-së në Dhomën e Kantoneve, Paul Rechtsteiner do të jetë sot në lëvizje nëpër gjithë Zvicrën. Ai do të udhëheqë tubimet e ndryshme të 1 Majit dhe do të mbajë fjalime në Spiez, Thun, Zofingen, Zug dhe Bulach.

Kësaj radhe manifestimeve të 1 Majit do t`u mungojë kryetari i SP-së, Christian Levrat, i cili ndodhet jashtë vendit.