Gashi vlerësohet lartë

Shkëlzen Gashi ka filluar t’i bind mediat amerikane dhe tifozët e Colorados për cilësitë që i ka. Edhe pse ka shënuar vetëm një gol deri më tani, ai i ka ndihmuar shumë skuadrës së tij në sulm dhe me pak fat ka mundur të shënojë më shumë.

Është e përditshmja “lastwordonsports.com”, që vlerëson paraqitjet e Gashit për këtë edicion, shkruan albinfo.ch. “Pas udhëtimi në Kansas City, ai provoi 15 gjuajtje dhe ka shënuar një gol në total gjatë katër ndeshjeve të tij në kampionat. Nuk duhet harruar se edhe gjatë sfidave kundër San Jose, Los Angeles dhe Salt Lake City ka pasur mundësi të mira për të shënuar. Na ka treguar qartë se sa i rrezikshëm mund të bëhet përpara portës”, shkruan kjo e përditshme.