Më 28 shkurt, pritet pjesëmarrje rekorde e votuesve

Në Cyrih përqindja e atyre që e kanë hedhur votën e tyre 12 ditë para përmblljes është 30%. E në vitin 2014 në këtë distancë kohore kishin qenë vetëm 18%. ---

Votimi i iniciativës «Për zbatimin e dëbimit të të huajve kriminelë» që do të bëhet më 28 shkurt, ka gjasa të mbërrijë nje rekord sa i përket pjesëmarrjes së qytetarëve me të drejtë vote. Kjo iniciativë ka mobilizuar me të madhe masat e njerëzve si të atyre që e miratojnë ashtu dhe të atyre që e kundërshtojnë atë. Një pasqyrë për numrin e madh të pjesëmarrësve në këtë votim popullor e jep edhe një anketë që e ka bërë magazina televizive «10vor10» e transmetuesit publik srf.

Sipas saj, në shumë qytete qysh të hënën (kur kishin mbetur edhe 12 ditë deri në ditën finale) kanë votuar numër më i madh se që ndodh zakonisht, transmeton albinfo.ch. Madje vihet në përfundimin se përqindja e votuesve kësaj here do të jetë ndër më të lartat në disa dhjetëvjetëshat e fundit.

Lukas Golder nga Instituti për Studimin e Opinionit Publik gfs.bern ka thënë se «të dyja palët po drejtojnë fushatat e tyre me emocione të forta. Kjo, sipas përvojës, elektrizon dhe mobilizon fuqishëm zgjedhësit».

Zyrat e qyteteve të ndryshme të Zvicrës kanë konfirmuar për emisionin «10vor10» se një «vërshim» të ngjashëm të votave me zarf e kanë përjetuar së fundi vetëm në votimin e bërë më 9 shkurt 2014, kur ishte votuar për iniciativën «Kundër Migracionit Masiv».

Kështu, në qytetin e Bernës tashmë kanë votuar 23% të personave me të drejtë vote. Ndërsa në vitin 2014 në distancë të njëjtë kohore kishin qenë vetëm 20 për qind. Por në Cyrih ndërkaq përqindja e atyre që e kanë hedhur votën e tyre është dhe më e lartë: 30%. E në vitin 2014 në këtë distancë kohore nga dita përmbyllëse (12 ditë) kishin qenë vetëm 18%.

Sipas Golder-it, një trend i tillë premton që në fund të ketë një pjesëmarrje prej rreth 55%. Në këtë mënyrë ky do të rradhitet në mesin e 10 referendumeve me pjesëmarrjen më të madhe që nga viti 1971 kur është votuar për të drejtën e votës së gruas.
Por, përqindjen absolutisht më të lartë të pjesëmarrjes së votuesve deri tash e ka siguruar referendumi i mbajtur në vitin 1992 për hyrjen në EWR (Zona Ekonomike Evropiane e Tregtisë)  me 78.7%. Në Iniciativen kundër mbipopullimit (1973) kishin votuar 70.3% ndërsa në atë kundër migracionit masiv (2014) 56.6%etj.