Sopranoja Etleva Shemai, shkëlqen në koncertin e Krishtlindjes në Gjermani

"Për kulmet e koncertit thjesht duhet të falënderojmë mezosopranon Etleva Shemai. Në dialogimin e bukur me klarinetin solo, me koloratura të pastra dhe të qarta, ajo ka kënduar një arie nga «Titus» i Mocartit"

Sopranoja shqiptare që jeton në SHBA, Etleva Shemai ka qenë mysafire e ftuar për të marrë pjesë në një koncert festiv në Gjermani. Për paraqitjen e saj të shkëlqyer kanë shkruar disa medie gjermane, të cilat vlerësojnë lart cilësitë e zërit të saj dhe theksojnë se prania e këngëtares shqiptare ka qenë në qendër të koncerteve ku është prezantuar.

«Uvertura festive dhe gazmore, të kompozitorëve të mëdhenj kanë pritur piblikun e koncertit të Krishtlindjes që është mbajtur ditën e parë të kësaj feste në Teatrin e Qytetit të Russelsheimit. Krahas Filarmonisë së Frankfurtit, msafire në ketë koncert ishte edhe këngëtarja e lindur në Shqipëri, Etleva Shemai», shkruan main-spitze.de, transmeton albinfo.ch.

Ndërsa gazeta “russelsheimer echo” shkon edhe më tutje: Për kulmet e koncertit thjesht duhet të falënderojmë mezosopranon Etleva Shemai. Në dialogimin e bukur me klarinetin solo, me koloratura të pastra dhe të qarta, ajo ka kënduar një arie nga «Titus» i Mocartit. Madhërishëm dhe e shoqëruar me sensibilitet e delikatesë nga orkestra, ajo ka interpretuar tingujt joshës të një arieje nga «Samsoni dhe Dalila», shkruan gazeta e përmendur, përcjell albinfo.ch. Por prezantimi i saj nuk përfundon me këtë: Ajo tregoi qëndrueshmëri të frymës dhe të zërit edhe për arie tjera të njohura nga repertori i muzikës klasike, shkruan veç tjerash gazeta gjermane.