Nga Tirana kërkohet unitet për dialogun me Serbinë

Kreu i Kuvendit të Shqipërisë, Gramoz Ruçi, u ka bërë thirrje partive politike në Kosovë që të jenë unike për fazën finale në dialogun Kosovë-Serbi.

Gjatë një konferencë për shtyp me homologun e tij të Kosovës, Kadri Veseli, Ruçi tha se bëhet fjalë për sovranitet dhe integritet territorial dhe të gjithë duhet të lënë anash interesat partiake, përcjell albinfo.ch.

“Ne inkurajojmë aktorët e përfshirë që kjo zgjidhje të jetë e drejtë, e pranueshme, afatgjatë dhe në interes të Kosovës dhe gjithë rajonit”, ka thënë Ruçi.

Ndërsa Veseli deklaroi se në dialogun përfundimtar mes Kosovës dhe Serbisë duhet të jenë bashkë, pozita dhe opozita. Nuk është koha për ego për pushtet, por është koha për unitet, theksoi Veseli.

“Nuk ka opsion tjetër. Ajo që e më shumë aktualisht e dëmton Kosovën është mungesa e unitetit, nuk është koha të mendojmë për ego të luftës për pushtet aktualisht. Është momenti të mendojmë për gjeneratat e ardhshme, në mënyrë që të fuqizojmë shtetin tonë. As Vuçiq nuk mund të dëmtojë sovranitetin tonë me ardhjen e tij në Kosovë”, ka thënë Veseli.

Ai së bashkë me zëvendëskryeministrat Fatmir Limaj e Dardan Gashi më herët kanë takuar ish-kryeministrin e Shqipërisë, Sali Berisha.

Edhe në këtë takim Veseli i bëri ftesë opozitës për unitet. Ndërsa Berisha tha se dialogu e marrëveshja janë me një rëndësi të madhe për rajonin në tërësi.

Sipas Berishës, integriteti territorial, sovraniteti i Kosovës nuk mund të jetë në asnjë rrethanë çështje diskutimi. Edhe zëvendëskryeministri Fatmir Limaj tha se duhet të ndërtohet grupi i unitetit, pasi tha se vetëm të bashkuar dhe unikë Kosova do të ecë përpara.