Aktakuza e re ndaj Thaçit dhe të tjerëve, javën tjetër mbahet konferenca mbi ecurinë e çështjes

Ka kaluar një javë që kur Gjykata Speciale e ka konfirmuar një aktakuzë të re kundër ish-presidentit të Kosovës, Hashim Thaçi, si dhe kundër katër personave të tjerë për vepra penale që lidhen me “pretendime për përpjekje të paligjshme për të ndikuar në dëshmitë e dëshmitarëve në gjykimin e krimeve të luftës ‘Thaçi dhe të tjerët’”.

Kështu, Hashim Thaçi, bashkë me Bashkim Smakajn, Fadil Fazliun, Isni Kilajn dhe Hajredin Kuçin përbëjnë grupin më të madh të të akuzuarve të përbashkët, ndaj të cilëve seancat nisin brenda 2 javësh nga ngritja e aktit akuzues.

Dhomat e Specializuara të Hagës kanë bërë të ditur se të martën do të mbahet një Konferencë mbi ecurinë e çështjes në rastin e Thaçit, Smakajt, Kilajt, Fazliut dhe Kuçit, e cila pritet të fillojë në orën 14:00.

Gjatë ditëve në vazhdim pritet të bëhen edhe deklarimet e fajësisë të lëna pezull nga Thaçi e Smakaj.

Kujtojmë se Smakaj, Fazliu dhe Kilaj u arrestuan më 5 dhjetor në Kosovë dhe u dërguan në ndërtesën e paraburgimit të Dhomave të Specializuara në Hagë një ditë më vonë, tha gjykata.

Gjykata kishte njoftuar se Hajredin Kuçit i ishte dorëzuar aktakuza e konfirmuar dhe fletëthirrja për t’u paraqitur para gjykatëses së procedurës paraprake, në bazë të aktakuzës së konfirmuar.

Thaçi – i cili është duke u gjykuar nga kjo gjykatë në një rast të ndarë kundër ish-krerëve të UÇK-së për krime lufte dhe krime kundër njerëzimit – akuzohet se bashkërendoi “tri grupe të veçanta” së bashku me Smakajn, Kilajn, Kuçin dhe Fazliun për të ndikuar në dëshmitë e dëshmitarëve të prokurorisë në rastin kundër tij dhe të tjerëve për krime lufte.