Vjelja e rrushit nis herët në Zvicër, cilësi e mirë por sasi më e vogël

Thatësira dhe temperaturat e larta kanë ndikuar në prodhim, ndërsa në disa zona vjelja pritet të fillojë deri në 12 ditë më herët

Vjelja e rrushit për vitin 2026 në Zvicër pritet të sjellë prodhim me cilësi të mirë, por në sasi më të vogël se parashikimet. Thatësira dhe valët e të nxehtit kanë ndikuar në vreshta, duke bërë që rrushi të piqet më herët dhe kokrrat të jenë më të vogla për shkak të mungesës së ujit.

Disa prodhues tashmë kanë nisur vjeljen, kryesisht të varieteteve që piqen më herët dhe të rrushit që përdoret për prodhimin e verërave të gazuara, transmeton albinfo.ch.

Në Valais, vjelja pritet të nisë gjatë javës së 24 gushtit në vreshtat me ekspozimin më të favorshëm, ndërsa nga 31 gushti pritet të zgjerohet në pjesën tjetër të rajonit. Kontrollet e pjekurisë tregojnë se këtë vit procesi është 6 deri në 12 ditë më i hershëm krahasuar me vitin 2022, i cili gjithashtu ishte karakterizuar nga temperatura të larta.

Pjekja e hershme paraqet edhe sfida për prodhuesit. Ata duhet të përcaktojnë momentin e duhur të vjeljes për të ruajtur ekuilibrin mes aciditetit, sheqerit, tanineve dhe ngjyrës së rrushit. Vjelja shumë e hershme mund të ndikojë në aromë, ndërsa ajo e vonuar mund të krijojë çekuilibër mes alkoolit dhe aciditetit.

Në kantonin Vaud, disa parcela janë prekur nga thatësira, por ndikimi në të gjithë sipërfaqen e vreshtave konsiderohet i kufizuar. Lloji i tokës dhe mosha e hardhive kanë luajtur rol të rëndësishëm, pasi tokat argjilore e ruajnë më mirë ujin, ndërsa hardhitë e vjetra mund të arrijnë rezervat më të thella ujore.

Thatësira ka pasur edhe një efekt pozitiv. Temperaturat e larta dhe lagështia e ulët kanë kufizuar zhvillimin e kërpudhave të padëshiruara, duke reduktuar nevojën për trajtime fitosanitare.

---