Dy aktivistët dënohen me 90 mijë franga

Policia e Basel-Stadt ka sqaruar se shuma prej 90 mijë frangash nuk është gjobë, por përfaqëson shpenzimet e krijuara gjatë operacionit

Dy aktivistë në Bazel janë faturuar me 90 mijë franga zvicerane për shpenzimet e një operacioni policor që u zhvillua për largimin e tyre nga një ish-kompleks kimik në Klybeck.

Rasti lidhet me një aksion të policisë në fillim të korrikut. Një burrë dhe një grua kishin qëndruar në skajin e çatisë së një ndërtese të lartë në ish-kompleksin kimik Klybeck në Kleinbasel. Pavarësisht përpjekjeve të policisë për t’i bindur të largoheshin, ata zbritën vetëm ditën e ardhshme.

Aktivistët kishin zënë ndërtesat e pabanuara dhe i kishin shndërruar ato në një qendër kulturore të vetëmenaxhuar, ku organizoheshin koncerte, shfaqje filmash, ushqime të përbashkëta dhe aktivitete të tjera. Ata argumentonin se Bazel ka mungesë të hapësirave të përballueshme dhe jokomerciale për projekte kulturore dhe sociale.

Policia e Basel-Stadt ka sqaruar se shuma prej 90 mijë frangash nuk është gjobë, por përfaqëson shpenzimet e krijuara gjatë operacionit. Sipas zëdhënësit të policisë Adrian Plachesi, disa zyrtarë policorë u detyruan të qëndronin të angazhuar për një periudhë më të gjatë për shkak se aktivistët refuzonin të largoheshin nga çatia.

Çështja e bartjes së shpenzimeve policore te pjesëmarrësit në protesta apo okupime të objekteve mbetet temë diskutimi në Zvicër. Policia ka theksuar se rasti në Klybeck ishte i pazakontë për shkak të kohëzgjatjes dhe mënyrës së ndërhyrjes.

Gjatë largimit të aktivistëve ishte zhvilluar edhe një demonstratë e paautorizuar në Basel. Në disa ndërtesa, përfshirë ndërtesën e bashkisë në Marktplatz, ishin shkruar slogane. Policia ka identifikuar dhe marrë në pyetje një të dyshuar, ndaj të cilit është paraqitur kallëzim penal dhe pritet t’i ngarkohen edhe shpenzimet e pastrimit.

 

 

---