Liqeni i Cyrihut arrin nivelin më të ulët historik të ujit

Thatësira e zgjatur ka bërë që pasojat e nivelit të ulët të ujit të bëhen gjithnjë e më të dukshme

Liqeni i Cyrihut ka arritur nivelin më të ulët të ujit që nga fillimi i matjeve, ndërsa thatësira e zgjatur në Zvicër tashmë po shkakton probleme konkrete për transportin dhe aktivitetet në liqen, shkruan swissinfo.ch, transmeton albinfo.ch

Sipas matjeve të autoriteteve federale në Zürichhorn, niveli i ujit ka rënë në 404.45 metra mbi nivelin e detit. Me këtë është thyer rekordi i mëparshëm i regjistruar në vitin 1952. Matjet në këtë pikë kanë filluar në vitin 1951.

Thatësira e zgjatur ka bërë që pasojat e nivelit të ulët të ujit të bëhen gjithnjë e më të dukshme. Që nga fillimi i kësaj jave, trageti Horgen–Meilen nuk lejon më transportimin e automjeteve të rënda. Kufizime vlejnë gjithashtu për veturat sportive dhe automjetet e tjera me distancë të vogël nga toka, pasi rënia e nivelit të ujit e bën më të pjerrët kalimin ndërmjet rampës dhe tragetit.

Probleme janë shfaqur edhe për pronarët e anijeve private, ndërsa në Stäfa është mbyllur një mol për arsye sigurie. Autoritetet paralajmërojnë se niveli i ulët i ujit mund të shkaktojë lëndime për personat që hidhen nga moli në liqen.

Situata ka prekur edhe sportin. Pishina sportive në Käpfnach të Horgenit, e cila përdoret nga ekipi lokal i vaterpolos, është mbyllur pasi struktura lundruese kishte filluar të prekte fundin e liqenit në një pikë.

Kompania e Navigacionit të Liqenit të Cyrihut kishte pezulluar më herët edhe shërbimet me anije në lumin Limmat. Kufizime të tjera janë vendosur për lundrimet turistike, ndërsa anijet nuk ndalojnë më në ishullin Ufenau.

Niveli rekord i ulët i Liqenit të Cyrihut vjen në një periudhë kur thatësira e vazhdueshme ka ulur ndjeshëm nivelet e lumenjve, përrenjve dhe liqeneve në pjesë të ndryshme të Zvicrës.

---