Zvicra zgjat statusin S për ukrainasit deri në mars 2028

Një ndryshim i rëndësishëm pritet nga marsi i vitit 2027. Personat me status S, pasi të kenë qëndruar pesë vjet në Zvicër, do të mund të pajisen me leje qëndrimi B

Qeveria zvicerane ka vendosur të zgjasë statusin e mbrojtjes S për refugjatët nga Ukraina deri të paktën më 4 mars 2028, duke vlerësuar se situata në Ukrainë nuk pritet të stabilizohet në mënyrë të qëndrueshme në të ardhmen e afërt.

Këshilli Federal e ka zgjatur statusin edhe për një vit, ndërsa vendimi është në përputhje me atë të Bashkimit Evropian, i cili mori një masë të ngjashme në fund të qershorit. Autoritetet zvicerane kanë theksuar se edhe në të ardhmen do të vazhdojnë ta koordinojnë politikën e tyre në këtë çështje me BE-në, transmeton albinfo.ch.

Bashkë me vazhdimin e statusit S do të mbeten në fuqi edhe masat mbështetëse për personat që përfitojnë nga kjo skemë. Konfederata kontribuon me 3,000 franga për person në vit për të mbështetur kantonet në përballimin e kostove përkatëse.

Një ndryshim i rëndësishëm pritet nga marsi i vitit 2027. Personat me status S, pasi të kenë qëndruar pesë vjet në Zvicër, do të mund të pajisen me leje qëndrimi B.

Megjithatë, autoritetet kanë paralajmëruar edhe kufizime të reja. Sipas vendimit, statusi S do t’u jepet vetëm personave që i përmbushin detyrimet e tyre ushtarake në Ukrainë.

Statusi S u mundëson personave të larguar nga Ukraina të marrin mbrojtje në Zvicër pa kaluar nëpër procedurën e zakonshme individuale të azilit.

---