900 milionë franga drejt Britanisë dhe Austrisë

Këto të holla rrjedhin nga tatimpaguesit austriakë dhe britanikë që kanë deponuar para në bankat e Zvicrës

Pas nënshkrimit të marrëveshje tatimore që ka bërë Zvicra me Britaninë e Madhe dhe me Austrinë, janë derdhur shumat e para të parave në të dy vendet e përmendura. Të marra së bashku, shumat e derdhura në Britani dhe Austri bëjnë 900 milionë franga, bën të ditur Administrata Tatimore e Zvicrës.

Këto të holla rrjedhin nga tatimpaguesit austriakë dhe britanikë që kanë deponuar para në bankat e Zvicrës. Bankat zvicerane kane ngritur një taksë të veçantë mbi këto të holla, për të mundësuar që kursimet e shtetasve në fjalë të legalizohen.

Sipas administratës tatimore të Zvicrës, në këtë mënyrë janë legalizuar deponime në vlerë prej 12 miliardë frangash.

Gjatë muajve në vijim do të derdhen pagesa të tjera në drejtim të dy vendeve të përmendura.