Sot fillon Evropiani i Futbollit

Në Varshavë, sot, duke filluar nga ora 18:00 fillon Kampionati Evropian i futbollit Euro 2012 me ndeshjen e parë Poloni- Greqi

Varshava pret sot rreth 800 mijë tifozë të futbollit. Autoritetet polake thonë se kanë marrë masa për sigurinë e e tifozëve. Për këtëqëllim janë angazhuar mbi 4.000 policë.

16 skuadra pjesëmarrëse të ndara në 4 grupe synojnë titullin e kampionit të Evropës. Kampionia e Europës dhe Botës në fuqi, Spanja, është skuadra që pretendon të mbrojë titullin dhe të jetë skuadra e parë që e fiton dy herë radhazi këtë trofe. Por, siç bëjnë të ditur kompanitë e basteve pretendentja kryesore për trofeun e evropianit 2012 është përfaqësuesja gjermane e drejtuar nga Joachim Low.

Ndërkaq, sipas analistëve sportivë, nuk duhet përjashtuar as Holanda nga gara për titull.

Euro 2012 që do të organizohet nga dy vende (Polonia dhe Ukraina) do të jetë aktiviteti më i pasur i historisë së kampionateve europiane. Nga shitja e të drejtës televizive të transmetit të ndeshjeve është përfituar një shumë prej rreth 840 milionë euro ose 4.8 % më shumë se Euro 2008 që u zhvillua në Austri dhe Zvicër.

Prezenca e 1.4 milionë tifozëve garanton 125 milionë të ardhura nga shitjet e biletave, ose 24 % më shumë se edicioni i kaluar.