Berisha siguron titullin e kampionit në Australi

2 golat e Besart Berishës mjaftuan që Brisbane të jetë kampion i Australisë

Futbollisti shqiptar Besart Berisha i ka siguruar ekipit australian „Brisbane Roar“ titullin e kampionit. Berisha ishte golashënuesi më i mirë në Kampionatin australian.

Në finalen e madhe ndaj skuadrës Perth Glory, 2 golat e futbollistit kosovar në minutat e fundit të ndeshjes mjaftuan që Brisbane të jetë kampion i Australisë.

Besart Berishës tashmë yll futbolli në Australi është bërë edhe top lajm në mediat australiane.

Besart Berisha ka fituar edhe çmimin e futbollistit më të mirë të vitit në A-League, të ndarë nga Asociacioni i Medieve (FMA) për paraqitjet e shkëlqyeshme të tij për Brisbane Roar. Kosovari 26 vjeç ka befasuar të gjithë me 19 golat e realizuara në sezonin e rregullt, por edhe kontributin e përgjithshëm në vitin e tij të parë në Australi.

Ylli kosovar kaloi tetë vite në Gjermani, kurse këtë diele zhvilloi finalen e Madhe në edicionin e tij të parë në Australi.

Berisha para dy javësh mori Këpucën e Artë të A-League dhe me epitetin e golashënuesit është shndërruar në yll të tifozëve të Roar.

Berisha së fundmi nënshkroi kontratë të re dyvjeçare me Brisbane dhe bëhet fituesi më i ri i çmimit, të votuar nga të gjithë anëtarët e FMA-së për futbollistin më të mirë të sezonit, pas fituesve të kaluar Matt McKay (2011) dhe Carlos Hernandez (2010).