Integrimi

Nga “Pizzaiolo” i Prizrenit, pronar restoranti në qendër të Usterit

Ka ardhur në Zvicër 12 vite më parë. Sot, Agron Ahmetaj është pronar i restorantit “Stella del Centro” në qendër të qytetit Uster

Jo të gjithë prizrenasit bëjnë bukë a byrek. I sapo ardhur në Zvicër në vitin 2005, Agroni punësohet si mjeshtër i picave  (Pizzaiolo) në një restorant italian në Cyrih ngase zanatin e kishte sjellë nga Kosova. Fillimisht si mjeshtër picash deri në vitin 2015, pastaj si kamerier dhe tash për disa vite si pronar i një restoranti në qendër të Usterit, të cilin e ka shndërruar në biznes familjar.

Agron Ahmetaj kishte migruar nga Korisha e Prizrenit në Zvicër në moshën 22 vjeçare. Tani pas  pak më shumë se 10 viteve, ai thotë se shumica e mjeshtërve të picave janë shqiptarë, dhe nuk janë më italianët. “Shqiptarët ua morën zanatin italianëve për përgatitjen e picave”, shprehet ai dhe fillon të rrëfejë për artin e picave në restorant.

Më shumë bëjnë pica shqiptarët se italianët

“Të gatuash është një lloj arti, një punë krejt origjinale, me të papritura të dobishme në kuzhinë”, thotë Agroni tek insiston që tashmë më shumë bëjnë pica shqiptarët se italianët. “E them me plot përgjegjësi, në shumicën e restoranteve përreth nëse shefi nuk është shqiptar, atëherë është mjeshtri i picave ose kuzhinieri, edhe pse disa ende hezitojnë të zbulojnë identitetin e tyre si shqiptarë”, thotë Agroni. Ai insiston se nuk ka kurrfarë pseudonimi italian edhe pse emri i restorantit është në italishte, “Stella del Centro”.

“Ka kaluar koha kur azilantët shqiptarë punësoheshin me emra italianë dhe kanë vazhduar me pseudonime italianësh deri më sot”, thotë Agroni. Megjithatë ai sqaron se nuk mund t’ia ndërrojë emrin restorantin me ndonjë emër shqiptar me arsyetimin se sidoqoftë ne jemi në Zvicër…

“Shpesh më thonë: përse restoranti mban emër italian edhe pse pronari nuk është italian?”, thekson Agron Ahmetaj, i bindur se një mjeshtër italian i picave nuk është më i mirë se një mjeshtër shqiptar. Personeli i restorantit është i përzier përveç pronarit dhe kuzhinierit, që janë nga Kosova.

“Do të kisha përgatitur me dëshirë edhe `pasul`

Por për të ardhur këtu ku është sot, Agron Ahmetajt i është dashur të mësojë shumë, të fitojë nga përvoja e ish punëdhënësve të tij. Pas disa vitesh, vjen hapi i parë i sprovës. Ai trashëgon restorantin italian nga një pronar që po ashtu është shqiptar.

“Shumica tashmë janë informuar se unë jam pronar shqiptar dhe këtë nuk e konteston askush”, flet Agroni për banorët e qytetit Uster, qyteti i tretë më i madh në Kantonin e Cyrihut.

Ai thotë se këtu vijnë më shumë vizitorë zviceranë ndërsa do të kishte dëshirë ta vizitonin edhe shqiptarët që dominojnë si komunitet i huaj në Uster. “Do të kisha përgatitur me dëshirë edhe `pasul` nëse kërkojnë vetëm duhet të rezervojnë me herët. Pastaj jam i hapur të bëjmë organizime të manifestimeve të ndryshme me shiptarët”, thotë Agroni, i cili e ka ëndërr që një ditë të bëjë një restorant me gatime shqiptare.

Aktiviteti “Shijet shqiptare”, në restorantin e Agronit

“Gatimet shqiptare nuk identifikohen vetëm me qebapët dhe `pasulin`. Nuk është e njëjtë sikur të shijoni një byrek në Prizren dhe një që e konsumoni në Zvicër”, shprehet Agroni duke treguar për ngjarjen “Shije Shqiptare” që ishte organizuar në restorantin e tij në fillim të dhjetorit. Qëllimi i këtij aktiviteti ishte promovimi i kuzhinës shqiptare, kulturës së ushqimit dhe prodhimeve shqiptare në Evropë.

Restoranti i Agronit kishte hapur dyert për kuzhinierët kulminantë shqiptarë  si: Sokol Prenga, Përparim Babalija e Faruk Neziri. Gatesat tradicionale shqiptare ata i kanë  paraqitur në një restorant të nivelit bashkëkohor, modern që e udhëheq Agron Ahmetaj nga Prizreni.

Ai tashmë ka marrë ftesën të jetë pjesë e këtij aktiviteti kulinare në të ardhmen që e organizon “Shije Shqiptare”

Foto: Agron Bajrami