Mbi gjysma e popullatës pa qasje në ujësjellës publik

Kosova duhet ta këtë sa më parë Ligjin për ujërat dhe në trajtimin e tyre të ketë një qasje vepruese ndër-sektoriale

Me rastin e Ditës Botërore të Ujit, Instituti Kombëtar i Shëndetësisë Publike (IKSHP), në bashkëpunim me Rrjetin e　Organizatave Joqeveritare “Eko-lëvizja”, organizuan sot Tryezën e rrumbullakët , me　moton: “Ujë për qytetet: përgjigje ndaj sfidës urbane”.

Ishte konkluzion i përbashkët i pjesëmarrësve se Kosova duhet ta këtë sa më parë Ligjin për ujërat dhe në trajtimin e tyre të ketë një qasje vepruese ndër-sektoriale.

Ministri i Shëndetësisë, Ferid Agani, tha se çështja e ujit duhet të paraqes njërën prej preokupimeve kryesore të Qeverisë, pasi që kjo çështje paraqet implikim të drejtpërdrejt për vet shëndetin e qytetarëve dhe është një çështje që duhet trajtuar me seriozitetin më të madh. Ministri Agani zotua se ministria e Shëndetësisë do ta jap përkrahjen adekuate që IKSHP të themelojë një departament të veçantë për ujin.

Ministri i Mjedisit dhe Planifikimit Hapësinor, Dardan Gashi, tha se kjo ministri është e vetëdijshme për problematikën e shkatërrimit të lumenjve dhe se ujërat duhet të mbrohen, por sipas tij, mungesa e ligjeve adekuate është një nga problemet në fushën e trajtimit të ujërave.

Robert Garnet , drejtor për Kosovë i Institutit për Komunitet të Qëndrueshëm, ka mbështetur iniciativat në fushën e trajtimit korrekt të ujërave dhe sidomos fuqizimin e rolit të shoqërisë civile në këtë fushë si partnere.

Në këtë tryezë, janë bërë edhe disa prezantime lidhur me gjendjen e ujit nga IKSHP, SHUKOS, ZRRUM, Agjencia e Kosovës për Mbrojtjen e Mjedisit, Green Group, etj.

Sipas ekspertëve, Kosova nuk ka ujë të mjaftueshëm, madje mund të konsiderohet si vend i varfër me ujëra. Sipas statistikave, vetëm 44 për qind e qytetarëve të Kosovës kanë qasje në ujësjellës publik. Vlerësohet se Kosova ka vetëm 1 600 metër kub 　ujë në vit për kokë banori.