Kurti: Do ta mirëprisnim vendimin e Greqisë për njohjen e Kosovës

Kreu i Qeverisë së Kosovës, kur ka folur për dialogun Kosovë-Serbi, ka potencuar se “Serbia duhet të distancohet nga regjimi i Millosheviçit, duke thënë se “Kosova kërkon t’i zgjidhë çështjet e pazgjidhura me fqinjët përmes dialogut”

Kryeministri i Kosovës, Albin Kurti, gjatë një interviste për gazetën greke “To Vima”, ka thënë se “ne i jemi mirënjohës Greqisë për mbështetjen e saj dhe qëndrimin pozitiv ndaj Kosovës në proceset e integrimit si në rajon, ashtu edhe Evropë, por sipas tij, “duke pasur parasysh peshën e Greqisë në rajon, si dhe frymën e bashkëpunimit në rajon, ne do ta mirëprisnim vendimin për njohjen e Kosovës. Njohja do të ishte dëshmi thelbësore e rolit udhëheqës në rajon që Greqia duhet të ketë”.

“Ne e vlerësojmë shumë qëndrimin konstruktiv ndaj vendit tonë, qëndrim të cilin Greqia e ka dëshmuar përsëri me mbështetjen e dhënë në favor të liberalizimit të vizave për qytetarët e Kosovës. Greqia duhet të jetë me popullin e Kosovës dhe të ofrojë mbështetjen e saj”, tha Kurti.

Sipas tij, “Greqia dhe Kosova duhet të forcojnë marrëdhëniet e tyre të pavarura për shkak të historisë së gjatë të përbashkët, qëllimit të përbashkët të stabilitetit dhe paqes në Ballkan dhe të ardhmes së gjatë të përbashkët”.

“Kosova dëshiron të ndërtojë mbi lidhjet historike midis popujve tanë dhe të forcojë marrëdhëniet vëllazërore afatgjata me Greqinë, një element i rëndësishëm i stabilitetit rajonal afatgjatë”.

“Ne e vlerësojmë shumë mbështetjen e Greqisë. Marrëdhëniet ekonomike Kosovë-Greqi janë duke u forcuar. Kjo dëshmohet nga forumi virtual ekonomik i organizuar nga dy MPJ-të përkatëse në muajin prill të vitit 2021. Ka ende hapësirë për rritjen e shkëmbimeve tregtare midis dy vendeve”, shtoi Kurti.

Kreu i Qeverisë së Kosovës, kur ka folur për dialogun Kosovë-Serbi, ka potencuar se “Serbia duhet të distancohet nga regjimi i Millosheviçit, duke thënë se “Kosova kërkon t’i zgjidhë çështjet e pazgjidhura me fqinjët përmes dialogut”.

“Ne do të kemi mundësi t’i rregullojmë marrëdhëniet në Ballkan vetëm me një dialog parimor dhe të përgatitur mirë, të bazuar në vlerat evropiane. Pavarësia e Kosovës është trembëdhjetëvjeçare. Që nga vendimi i Gjykatës Ndërkombëtare të Drejtësisë në vitin 2010, që vërtetoi faktin se Deklarata e pavarësisë së Kosovës nuk kishte shkelur të drejtën ndërkombëtare, debati për shtetet është mbyllur. Unë nuk do të diskutoj statusin e Kosovës, as integritetin tonë territorial. Është çështje e zgjidhur”.

Kurti ka shtuar se nuk mund ta lejojë ringjalljen e projekteve të dështuara për shkëmbimin territorial e as të atyre për bosnjëzimin e Kosovës.

“Serbia tani duhet të distancohet nga regjimi i Millosheviçit dhe të mos insistojë që në një farë mënyre të vazhdojë t’i arrijë qëllimet e vjetra, me mjete të reja. Tema e vetme është marrëdhënia ndërmjet Kosovës dhe Serbisë”, tha Kurti.

Kryeministri Kurti, i cili së fundmi ishte në Athinë për konferencën e “The Economist” dhe pati një takim të shkurtër me kryeministrin grek Kyriakos Mitsotakis, është shprehur qartazi kundër një shkëmbimi territorial me Serbinë dhe kundër rivendosjes së kufijve në Ballkan.

Ai ka thënë se përgjigjja më e mirë ndaj “non-paperave” do të ishte “no comment”.

“Unë vazhdoj të besoj se përgjigjja më e mirë ndaj të gjitha këtyre “Non Papers” është “No comment”, sepse përmes përgjigjeve, ato po përpiqet të sjellen në jetë. Ne duhet të shkojmë drejt integrimit evropian dhe euro-atlantik. Kosova nuk ka dilema. BE dhe NATO janë vlera tonat, ashtu edhe destinacion yni.

“Duke ditur që korniza aktuale rajonale nuk mund të na përgatitë për pranim në BE, në Samitin e Tiranës unë kam propozuar që të përditësojmë CEFTA-n në SEFTA (Marrëveshja e Tregtisë së Lirë e Evropës Juglindore) bazuar në modelin EFTA – EEA, që do të lartësonte të gjithë rajonin dhe do të kapërcente pengesat aktuale”.

Kryeqeveritari Kurti ka thënë se shpreson që Komisioni Evropian mund ta konsiderojë seriozisht këtë propozim dhe të fillojë dialogun që do të çonte në rezultate konkrete.

“Ne jemi të bindur se nëse ecim së bashku në këtë rrugë, atëherë do të jemi në gjendje të adresojmë shumë sfida dhe të arrijmë objektivin tonë të përbashkët”, ka përfunduar Kurti.

 

---

LAJME INTERESANTE NGA INTERNETI