Gjilanasit i kushtojnë këngë qytetit të tyre

Mbrëmë është kënduar për herë të parë kënga kushtuar Gjilanit, në një organizim që është bërë në ambientet e kafiterisë „Soho“ në Gjilan, ku është promovuar albumi i parë i këngëtarit gjilanas Faton Isufi, shkruan albinfo.ch

Në mesin e dhjetë këngëve të albumit „Premtoj“, këngëtari i ri, Faton Isufi, ka veçuar këngën për Gjilanin si pjesën më të bukur të albumit të tij.

Tekstin e kësaj këngëje e ka shkruar Arbëresh Dalipi, muzika dhe orkestrimi janë realizuar nga Endrit Rexhepi dhe Pimi Isufi, ndërsa në instrumentet orientale ka luajtur instrumentisti i njohur Astrit Stafaj.

Në këtë promovim kjo këngë është cilësuar si njëra nga realizimet më speciale që i kushtohet historisë së qytetit, me të cilin janë të lidhur emocionalisht shumë qytetarë gjilanas. E veçmas, kjo këngë prek ata gjilanas që nuk janë më rezident në këtë qytet.

Autori ka dhënë një përshkrim të gjerë për këngën duke sjellë detaje nga teksti, i cili përshkruan në kuvertën e albumit këngën për Gjilanin si këngë origjinale kushtuar historisë së qytetit të Gjilanit, që nga themelimi, lulëzimi ekonomik, kontributi historik, deri te legjendat dhe bejtet për qytetin.

“Për ta ngjeshur krejt këtë histori në një këngë, është dashur patjetër që të mos e personalizonim apo të mos e kufizonim në emra të përveçëm, por për këtë të përdornim përshkrime përgjithësuese për t’i përfshirë të gjithë brenda rrëfimit”, ka sqaruar autori i tekstit Arbëresh Dalipi.

Faktet që kishte shkëputur nga historia ishin interesante për të pranishmit, kur u tregua se ora e sahakullës së vjetër të qytetit, e cila ishte në lokacionin e shtëpisë së mallrave, pas rrënimit i ishte vendosur kishës ortodokse të qytetit. Lagjja e bejlerëve ishte afër çarshisë së zejtarëve, të cilat i ndante rruga. Qyteti në atë kohë kishte një shatërvan dhe rreth 22 çeshme. Kishte rreth 151 zeje zë ndryshme, 242 dyqane zejtare dhe një çarshi të mbyllur, bezistan, me rreth 60 dyqane. Në atë kohë kishte edhe 20 hane që ofronin shërbime fjetjeje për udhëtarët dhe kafshët e ngarkesës. Autori gjithashtu shpjegoi edhe arsyen e përmendjes së mejtepeve në njërën anë, që ishin shkollat e fesë dhe mejhaneve, që ishin pijetoret e kohës në anën tjetër, kjo për arsyen e përfshirjes së të dy shtresave të shoqërisë, edhe atyre që ishin të shkollës, edhe atyre që bënin qejf në pijetore.

Në përshkrimin e procesit të realizimit të këngës, autori i tekstit rrëfeu para pjesëmarrësve edhe disa ngjarje që e karakterizuan këtë proces derisa kënga u finalizua.

„Për ironi, unë dhe Fatoni nuk po jetonim prej disa vitesh në Gjilan, dhe kjo na paska bërë që t’i kushtojmë këtë këngë Gjilanit “, u shpreh para një audience të gjerë artdashëse, duke e quajtur me sarkazmë Prishtinën si një vend të largët e duke i krahasuar veten veten dhe gjilanasit e tjerë që po punojnë në Prishtinë me të shpërngulurit në Turqi.

E për ta përmbyllur krejt këtë histori dhe dashuri për qytetin, kënga përfundon me strofën:

Sado gjatë unë të jetoj

Kudo në botë jeta me më çu

Me asgjë Gjilan s’të ndërroj

Dhe në amshim kam me të kujtu

 

Teskti i këngës:

KËNGA E GJILANIT

Kam shumë mall për gjolet tua

Për kalldrëmin në çarshi

N’sahatkullë me e matë ditën

N’shatërvan ujtë tënd me pi

Me mejtepe e me mejhane

Me bejlerë e zanatli’

Vend i vjetër për pazare

Me tregtarë e me hanxhi

 

Ref:

Pa të drejtë ty të kan pas thanë:

O Gilan he viran

Shtatë mejhane nji dyqan

Mos t’ish kan qai shatërvani

Shkret pa të ish mbet Gilani

 

Ke pasë nam Gjilan ndër vite

N’histori me nder ke hy

Për gjithë vendin ke dhanë emra

Dijetarë, pishtarë t’lirisë

 

Por ti vuajtjet i mban në zemër

N’gji e mban dhe krenarinë

Se askush ty s’ta ul namin

Askush ty s’ta prek lavdinë

 

Ref:

Pa të drejtë ty të kan pas thanë:

O Gilan he viran

Shtatë mejhane nji dyqan

Mos t’ish kan qai shatërvani

Shkret pa të ish mbet Gilani

 

Kush t’pagëzoi me t’bukurin emër

E të bekoi ty me dashni

Loti i syrit të Gjejlanes

Pengu i ushtarit të ri

 

Sa do gjatë unë të jetoj

Kudo në botë jeta me m’çu

Me asgjë Gjilan s’të ndrroj

Dhe n’amshim kam me t’kujtu

 

 

Këndon:

Faton Isufi

 

Orkestrimi:

DUOBAS records

Endrit Rexhepi

Pimi Isufi

 

Llautë & Saz:

Astrit Stafa

 

Teksti:

Arbëresh Dalipi

---