Tre shqiptarë në kombëtaren M19 të Zvicrës në futboll

Në ndeshjet për Kampionatin Botëror “U19” lojtarët shqiptarë Veseli, Ajeti dhe Xhemshiti treguan lojëra të mira. Zvicra u diskualifikua

Në kuadër të ndeshjeve kualifikuese për kampionatin evropian M19, Zvicra bëri gara në grupin 2 së bashku me Spanjën, Anglinë dhe Malin e Zi.

Eliminatoret u zhvilluan në formë turniri. Ato u luajtën në tre qytete të kantonit Vaud, në Lozanë, Nyon dhe Yverdon.

Në ndeshjen e parë Zvicra -Spanja e cila u zhvillua në Lozanë, fitore shënuan spanjollët me rezultat 2 :1. Në këtë ndeshje luajti futbollisti shqiptar Frederik Veseli, futbollist i Mançester Sitit i cili ishte edhe kapiten i ekipit.

Ndeshja e dytë Zvicra-Anglia u zhvillua në Nyon. Pas një loje dramatike fitorja u takoi anglezëve me rezultat 3 : 2. Pas kësaj humbjeje, formacioni zviceran i humbi shpresat për kualifikim. Në këtë ndeshje ishte titullar dhe luajti tërë ndeshjen Veseli, kurse nga minuta 46 u aktivizua edhe futbollisti tjetër shqiptar, Arlind Ajeti, futbollist i  ri i FC Baselit.

Në ndeshjen e fundit kualifikuese kundër Malit të Zi,  në Yverdon, Zvicra shënoi fitore 3 : 2. Ishte kjo fitore e nderit sepse nuk mjaftoi për kualifikim. Në këtë ndeshje Veseli ishte rezervë dhe nuk u aktivizua fare, kurse tërë ndeshjen e luajtën Arlind Ajeti dhe i riu Berat Xhemshiti, lojtar i FC Zürihut

Në përgjithësi, lojtarët shqiptarë treguan lojëra të mira. Veseli e Ajeti në mbrojtje e Xhemshiti në mesfushë.

Nga ky grup u kualifikua Spanja e cila përfundoi e para me 7 pikë nga tri ndeshje, po aq pikë mblodhi edhe Anglia por me goldallim më të dobët. Spanja do të marrë pjesë në Kampionatin Evropian M19 i cili zhvillohet në Rumani gjatë muajit korrik të këtij viti.

Rezultatet komplete të grupit 2  : Zvicra -Spanja 1 : 2.  Anglia-Mali i Zi 1 : 0, Spanja -Mali i Zi 3 : 0, Anglia-Zvicra 3 : 2, Mali i Zi–Zvicra  2 : 3, Aglia-Spanja 1 : 1