OJQ-të alarmojnë: sistemi i ndihmave emergjente nuk po funksionon!

Sumica e azilkërkuesve me status të refuzuar, kanë kaluar në ilegalitet ose vazhdojnë të jetojnë nga ndihmat emergjente

Organizata për mbrojtjen e refugjatëve “Flüchtlingshilfe” bashkë me OJQ tjera zvicerane kanë apeluar për një rishikim të sistemit të ndihmës emergjente për azilkërkuesit, sistem ky që praktikohet vitet e fundit.

Sipas tyre, ky sistem nuk po funksionon. Është vetëm një numër simbolik i azilkërkuesve që marrin ndihma emergjente dhe që kanë vendosur të kthehen në vendet prej nga kanë ardhur. Bindja e refugjatëve për tu kthyer, ishte qëllimi të cilin ia kishte vënë vetes Qeveria e Zvicrës kur kishte vendosur të fuste në funksion sistemin e “ndihmës emergjente”.

Ka ndodhur e kundërta, shumica e azilkërkuesve të cilëve u është refuzuar kërkesa për strehim, kanë kaluar në ilegalitet ose vazhdojnë të jetojnë nga ndihmat e tilla, emergjente. Të dyja këto mënyra jete, sipas apeluesve, janë jo të denja për njeriun.

Një propozim i tyre është rritja e shumës së të hollave për kthim, si një motivim për tu kthyer azilkërkuesit në vendet e prejardhjes.

Shuma maksimale ditore që aktualisht marrin azilkërkuesit si ndihmë emergjente është 12 franga.